2021-2022 ஆம் ஆண்டில், அச்சு, தொலைக்காட்சி மற்றும் டிஜிட்டல் தளங்கள் உட்பட இந்திய ஊடகங்களில் 88% தலைமைப் பதவிகள் உயர்சாதி பிரிவை சேர்ந்தவர்கள் என சமீபத்திய அறிக்கை கண்டறிந்துள்ளது. கடந்த 2018 – 2019-ம் ஆண்டின் நிலை போலவே 2021 – 2022-ம் ஆண்டின் நிலையும் உள்ளது.
ஆக்ஸ்ஃபாம் இந்தியா (Oxfam India) – நியூஸ்லாண்ட்ரி (Newslaundry) இணைந்து “Who Tells Our Stories Matters: Representation of Marginalised Caste Groups in Indian Media” என்ற தலைப்பில் கடந்த ஏப்ரல் 2021 – மார்ச் 2022 இடையே மேற்கோண்ட ஆய்வின் முடிவுகள் நமக்கு இதைத் தெரிவிக்கிறது. பல தரப்பட்ட மீடியாக்களில் வெவ்வேறு சாதிகளைச் சேர்ந்த மக்களின் பிரதிநிதித்துவத்தை ஆய்வு செய்ய இது ‘பைலைன் எண்ணிக்கை’ முறையைப் பயன்படுத்தி ஆய்வு மேற்கொள்ளப்பட்டுள்ளது.
பிரதான அச்சு, தொலைக்காட்சி மற்றும் டிஜிட்டல் தளங்களின் 218 தலைமைப் பதவிகள் ஆய்வுக்காக எடுத்துக் கொள்ளப்பட்டன. அதில் 191 (88%) தலைமைப் பதவிகள் உயர்சாதியினரின் கரங்களில் உள்ளன. தலித் மற்றும் பழங்குடியினரில் ஒருவர் கூட எந்த ஊடகத்திலும் தலைமைப் பதவி வகிக்கவில்லை எனும் அதிர்ச்சியூட்டும் தகவல் இந்த ஆய்வில் தெரியவந்துள்ளது.
2018 – 2019-ம் ஆண்டின் போதான 121
நியூஸ்ரூம் தலைமைப் பதவிகள் ஆய்வுக்கு எடுத்துக் கொள்ளப்பட்டன. அதில் 106 (88%) தலைமைப் பதவிகளில் உயர் சாதியினரிடம் தான் இருந்தன. இந்த ஆய்வானது அக்டோபர் 2018 – மார்ச் 2019 காலகட்டத்தில் நடத்தப்பட்டது.
நெறியாளர்கள், கட்டுரையாளர்கள் என அனைத்து நிலைகளிலும் உயர்சாதியினரின் ஆதிக்கமே நீடிக்கிறது.
எந்த முக்கிய ஊடக நிறுவனங்களிலும் எஸ்சி/எஸ்டி பிரிவைச் சேர்ந்தவர்கள் தலைமைப் பொறுப்புகளில் இல்லை எனவும் ஆய்வில் தெரியவந்துள்ளது.
அச்சு ஊடகங்கள்:
அச்சு ஊடகங்களில் (ஆங்கிலம் மற்றும் ஹிந்தி செய்தித்தாள்களில்) எழுதப்படும் கட்டுரைகளில் 60% கட்டுரைகள் (அதாவது ஐந்தில் மூன்று) உயர் சாதியினரால் எழுதப்படுகிறது. வெறும் 10% கட்டுரைகள் மட்டுமே இதர பிற்படுத்தப்பட்ட வகுப்பினரால் (Other Backward Classes) எழுதப்படுகிறது. தலித் மற்றும் பழங்குடியினரால் 5 சதவீதத்திற்கும் குறைவான கட்டுரைகளே எழுதப்படுகின்றன.
சஞ்சிகைகளை எடுத்துக் கொண்டால் பாதிக்கும் மேற்பட்ட கட்டுரைகள் உயர் சாதியினராலேயே எழுதப்படுகின்றன. சஞ்சிகைகளில் பணியாற்றுபவர்களை எடுத்துக் கொண்டால் 10 சதவீதத்திற்கும் குறைவானவர்களே தலித்துகளாக உள்ளனர். பழங்குடியினரின் பிரதிநிதித்துவம் சஞ்சிகைகளில் குறிப்பிடும்படியாக இல்லை அல்லது முற்றிலுமாகவே இல்லவே இல்லை (0%) என்ற அவல நிலைதான் நீடிக்கிறது.
தொலைக்காட்சி ஊடகங்கள் :
ஆங்கில செய்தி சேனல்களை பொறுத்தவரை 55.6% தொகுப்பாளர்கள் உயர்சாதியைச் சேர்ந்தவர்கள். 11.1% தொகுப்பாளர்கள் மட்டுமே OBC பிரிவைச் சார்ந்தவர்கள். SC மற்றும் ST வகுப்பை சார்ந்தவர்கள் ஒருவர் கூட தொகுப்பாளராக இல்லை.
ஆங்கிலம் மற்றும் ஹிந்தி செய்தி நிறுவனங்களின் பிரைம் டைம் விவாத நிகழ்ச்சிகளில் கூட 60 சதவீதத்திற்கும் மேலாக உயர்சாதியினர் தான் பங்கெடுக்கின்றனர். SC மற்றும் ST வகுப்பினரைப் பொறுத்தவரை வெறும் 5 சதவீதத்துக்கு குறைவானவர்களே விவாதங்களில் பங்கேற்கத் தேர்வு செய்யப்படுகின்றனர்.
டிஜிட்டல் ஊடகங்கள்
டிஜிட்டல் ஊடகங்களைப் பொருத்தவரை EastMojo, Firstpost, Newslaundry, Scroll, The Wire, the News Minute, Swarajya, the Mooknayak மற்றும் The Quint ஆகிய 9 ஊடகங்கள் கணக்கில் எடுத்துக் கொள்ளப்பட்டன.
அதில், Newslaundry English-ன் 68.5% கட்டுரைகளும், Firstpost-ன் 61% கட்டுரைகளும், Scroll-ன் 54% கட்டுரைகளும், The Wire-ன் 50% கட்டுரைகளும் உயர்சாதியினரால் எழுதப்படுபவை. Mooknayak-ல் மட்டும்தான் பெரும்பான்மையான கட்டுரைகள் தாழ்த்தப்பட்ட வகுப்புகளைச் சேர்ந்தவர்களால் எழுதப்படுகின்றன.
இந்த ஆய்வு குறித்துப் பேசிய ஆக்ஸ்பாம் இந்தியாவின் தலைமை நிர்வாக அதிகாரியான அமிதாப் பெஹர் (Amitabh Behar) கூறியதாவது: “கடந்த மூன்று ஆண்டுகளில் வெளியான எங்களது இரண்டாவது அறிக்கை இது. இந்தியாவில் உள்ள செய்தி நிறுவனங்கள் நாட்டில் உள்ள பெரும்பான்மையான விளிம்புநிலை மக்களை உள்ளடக்கிய இடம் அல்ல என்பதை இது காட்டுகிறது. தலித்துகள், பழங்குடிகள் மற்றும் பிற்படுத்தப்பட்ட மக்களுக்கு ஏற்ற சூழலை உருவாக்குவதில் ஊடகங்கள் தோல்வியடைந்துள்ளன. நாட்டில் உள்ள ஊடகங்கள் சமத்துவம் என்ற அரசியலமைப்புக் கோட்பாட்டை அதன் செய்திகளில் மட்டுமல்ல, அதன் பணியமர்த்தல் நடைமுறைகளிலும் நிலைநிறுத்த வேண்டும்”
தொலைக்காட்சி செய்தி விவாதங்களில் மக்களைப் பாதிக்கும் பிரச்சினைகள் ஏன் விவாதத்திக்க படுவதில்லை , எப்போது பார்த்தாலும் மதத்தை வைத்தே விவாதங்கள் ஏன் நடைபெறுகின்றன என்பதற்கான காரணமும் இந்த ஆய்வின் மூலம் விளங்கி கொள்ளும் வகையில் உள்ளது.
நன்றி : The wire, NewsLaundry, The hindu
