கிரேட் நிக்கோபார் தீவில் சர்ச்சைக்குரிய 16,610 ஹெக்டேர் திட்டத்திற்கு மோடி அரசின், சுற்றுச்சூழல் அமைச்சக வல்லுனர்களின் குழு புதன்கிழமை ஒப்புதல் அளித்துள்ளது .
75,000 கோடி மதிப்பிலான திட்டம்:
75,000 கோடி செலவில் திட்டமிடப்பட்டுள்ள இந்த திட்டத்தில் கிரீன்ஃபீல்ட் சர்வதேச விமான நிலையம், சர்வதேச கொள்கலன் முனையம், டவுன்ஷிப் மற்றும் மின் உற்பத்தி நிலையம் ஆகியவை அடங்கும் என்று எகனாமிக் டைம்ஸ் (ET) கட்டுரை தெரிவித்துள்ளது.
“பொதுவாக இந்தியப் பெருங்கடல் பகுதி மற்றும் குறிப்பாக இந்தியப் பெருங்கடல் , சமீபத்திய ஆண்டுகளில் ஒரு மூலோபாய ஹாட்ஸ்பாடாக மாறியுள்ளது. இந்த IOR இன் அதிகரித்து வரும் மூலோபாய மதிப்புக்கு பதிலளிக்கும் வகையில், அந்தமான் மற்றும் நிக்கோபார் தீவுகளில் ஒரு முக்கியமான வளர்ச்சி அவசியமாக உள்ளது. இது இந்தியாவின் பிராந்திய இருப்பை வலுப்படுத்தும்”, என்று எகனாமிக் டைம்ஸ் தெரிவித்துள்ளது.
850,000 மரங்கள், சதுப்புநில காடுகள் நீக்க அனுமதி:
இந்த தீவு கடந்த 1989 இல் உயிர்க்கோளக் காப்பகமாக அறிவிக்கப்பட்டது. 2013 இல் ‘யுனெஸ்கோவின் மனிதன்’ மற்றும் உயிர்க்கோள திட்டத்தில் சேர்க்கப்பட்டது.
இந்த திட்டங்களை நிறைவேற்ற சுமார் 850,000 க்கும் அதிகமான மரங்களை வெட்ட வேண்டும். 12-20 ஹெக்டேர் சதுப்புநில காடுகளை இழக்க நேரிடும். இது பவளப்பாறைகளுக்கு கணிசமான இழப்பை ஏற்படுத்தும். 298 ஹெக்டேர்களுக்கு மேல் கடல் படுகையிலும் உரிமை கோரும்.
திட்டத்திற்கு அனுமதி:
இந்தத் திட்டம் நிறைவேற்றப்பட்டால் தீவின் தாவரங்கள் மற்றும் விலங்கினங்களுக்கு பெரும் தீங்கு விளைவிக்கும் என்பதை அறிந்த நிலையில் உள்கட்டமைப்பு திட்டங்களுக்கான, நிபுணர் மதிப்பீட்டுக் குழு இந்த திட்டங்களுக்கு அனுமதி வழங்கி உள்ளது. இதற்கான முக்கிய காரணம், இது பற்றி ஊடகங்களில் பெரிதாக செய்தி வெளியாகவும் இல்லை விவாத பொருளாகவும் ஆக்கப்படவில்லை.
பழங்குடியினருக்கும் பாதிப்பு:
இந்த தீவு ஷொம்பென் பழங்குடியினரின் தாயகமாகும், மேலும் நிக்கோபார் மெகாபோட், லெதர்பேக் ஆமைகள், உள்ளூர் நிக்கோபார் மக்காக் மற்றும் உப்பு நீர் முதலைகள், அரிய வகை தாவரங்கள் மற்றும் விலங்கினங்கள் உள்ள இடமாகவும் இந்த பறந்து விரிந்துள்ள தீவு உள்ளது. நிக்கோபார் மெகாபோட்டின் 51 கூடுகளில் கிட்டத்தட்ட 30 கூடுகள் நிரந்தரமாக அழிக்கப்படும் என்று ET அறிக்கை மேலும் தெரிவிக்கிறது.
எதிர்ப்பு எழுந்தால் பதில் அளிக்க குழுக்கள் நியமனமா?
மோடி அரசின் இந்த திட்டத்திற்கு சிறிய அளவிலான எதிர்ப்பு எழுந்த நிலையில் மூன்று சுயாதீன குழுக்கள் அமைக்கப்படும் என சுற்றுச்சூழல் அமைச்சகம் தெரிவித்துள்ளது. மாசுபாடு தொடர்பான விஷயங்களை மேற்பார்வையிட ஒரு குழு, பல்லுயிர் பெருக்கத்தை மேற்பார்வையிட ஒரு குழு, ஷோம்பன் மற்றும் நிக்கோபரீஸ் பழங்குடியினர் நலன் மற்றும் பிரச்சினைகளை மேற்பார்வையிட மூன்றாவது ஒரு குழு நியமிக்கப்படும் என தெரிவிக்கப்பட்டுள்ளது.
மீடியாக்கள் மௌனம்:
இந்தியாவில் திறந்தவெளி காடுகள் மற்றும் புல்வெளி சுற்றுச்சூழல் அமைப்புகளை மீட்டெடுப்பதற்கு சிறுத்தைகள் உதவிகரமாக இருக்கும். பல்லுயிர் பாதுகாப்பு, நீர் பாதுகாப்பு, கார்பன் சுரப்பு மற்றும் மண்ணின் ஈரப்பதம் பாதுகாப்பு போன்ற சுற்றுச்சூழல் அமைப்புகளை மேம்படுத்தவும் அவை துணையாக இருக்கும் என்றெல்லாம் ஒரு புறம் மீடியாவில் செய்திகளை வெளியிட மற்றொரு புறம் இந்த செய்தி குறித்து மீடியாக்கள் மௌனம் ஏன் என கேள்வி எழுந்துள்ளது.
