இன்று (31-10-19 ) பாகிஸ்தானில் கராச்சி-ராவல்பிண்டி தேஸ்காம் எக்ஸ்பிரஸ் தீப்பிடித்ததால் குறைந்தது 65 பேர்உயிரிழந்தனர் மற்றும் பலர் காயமடைந்தனர் என்று பாகிஸ்தான் ஊடகங்களை மேற்கோள் காட்டி ANI செய்தி வெளியிட்டுள்ளது.
பாகிஸ்தானின் ரயில்வே அமைச்சர் ஷேக் ரஷீத் அஹ்மத் கூறுகையில், 40 க்கும் மேற்பட்ட பயணிகள் பலத்த தீக்காயங்களுக்குள்ளாகியுள்ளதால் இறப்பு எண்ணிக்கை மேலும் அதிகரிக்கக்கூடும் என்று தெரிவித்துள்ளார்.
இந்த சம்பவத்திற்கு பாகிஸ்தான் பிரதமர் இம்ரான் கான் இரங்கல் தெரிவித்துள்ளார், மேலும் இந்த சம்பவம் குறித்து உடனடியாக விசாரணைக்கு உத்தரவிட்டதாகவும் தெரிவித்துள்ளார்.
இந்த சம்பவம் பஞ்சாப் மாகாணத்தில் ரஹீம் யர் கான் அருகே லியாகத்பூரில் நடந்துள்ளது. தீயில் கருகி 3 ரயில் பெட்டிகள் நாசம் ஆகியுள்ளது.தற்போது தீ அணைக்கப்பட்டுள்ளதாகவும், குளிரூட்டும் முயற்சிகள் நடந்து வருவதாகவும் அமைச்சர் அஹ்மத் தெரிவித்துள்ளார்.
மேலும் மீட்பு நடவடிக்கை நடைபெற்று வருவதாகவும், காயமடைந்தவர்களை மருத்துவமனைகளுக்கு மாற்ற இராணுவ ஹெலிகாப்டர்கள் பயன்படுத்தப்பட்டு வருவதாகவும் பாகிஸ்தான் ராணுவம் வெளியிட்டுள்ள அறிக்கையில் தெரிவிக்கப்பட்டுள்ளது.
“பரவி வரும் தீயில் இருந்து தப்பிக்கும் விதமாக ஓடும் ரயிலிலிருந்து குதித்ததில் தான் பலர் உயிர் இழந்துள்ளனர் ” என்று பாகிஸ்தான் நாட்டின் ரயில்வே அமைச்சர் ஷேக் ரஷீத் அஹமது தெரிவித்துள்ளார்.
